Luk 8 | NdeIBE | STEP | Ngemuva kwalokho uJesu wahambahamba engena kuleli laleli idolobho lemizi, ememezela izindaba ezinhle zombuso kaNkulunkulu. Abalitshumi lambili babelaye,

Luke 8

Umzekeliso Womhlanyeli

1 Ngemuva kwalokho uJesu wahambahamba engena kuleli laleli idolobho lemizi, ememezela izindaba ezinhle zombuso kaNkulunkulu. Abalitshumi lambili babelaye,

2 kanye labesifazana ababephilisiwe emimoyeni emibi lezifeni: uMariya (owayethiwa nguMagadalena) okwakuphume kuye amadimoni ayisikhombisa; 3 uJowana umkaKhuza, umlawuli wendlu kaHerodi; uSusana; labanye abanengi. Abesifazana laba babebasiza ngabakuswelayo izindleko zingezabo.

4 Kwathi sekubuthana ixuku labantu elikhulu labantu besiza kuJesu beqhamuka emadolobheni atshiyeneyo wabatshela lo umzekeliso:

5 “Umlimi waphuma wayahlanyela. Wathi elokhu eyihaza inhlanyelo, eyinye yawela endleleni; yanyathelwa, izinyoni zemoyeni zayidobha. 6 Eyinye yawela edwaleni, yathi isathi iyakhula yabuna ngoba yayingelabumanzi.

7 Eyinye inhlanyelo yawela phakathi kwameva, akhula kanye layo aminyezela izihlahlana zayo.

8 Kanjalo eyinye inhlanyelo yawela emhlabathini ovundileyo. Yakhula yathela amabele, eva ngekhulu okudlula okwakuhlanyelwe.” Wathi esetsho lokhu wamemeza wathi, “Lowo olazo izindlebe, kezwe.”

9 Abafundi bakhe bambuza ukuthi umzekeliso lowo wawusitshoni.

10 Wathi, “Ulwazi lwemfihlo yombuso kaNkulunkulu seliluphiwe lina, kodwa kwabanye ngikhuluma ngemizekeliso, ukuze kuthi “ ‘loba bebona, bangaboni; loba besizwa, bangaqedisisi.’

11 “Nansi incazelo yomzekeliso: Inhlanyelo iyilizwi likaNkulunkulu. 12 Labo abasendleleni ngabalizwayo, kodwa uSathane eze alihluthune ilizwi ezinhliziyweni zabo, ukuze bangakholwa basindiswe. 13 Labo abasedwaleni yibo abemukela ilizwi ngentokozo nxa belizwa, kodwa kabalampande. Bayakholwa okwesikhatshana, kodwa kuthi ngesikhathi sobunzima bagudluke.

14 Inhlanyelo eyawela emeveni imele labo abezwayo, kodwa baqhubeke ngeyabo indlela bakhanywe yizinhlupheko zempilo, inotho kanye lezikholisisayo, bangabe besakhula baphelele.

15 Kodwa inhlanyelo esemhlabathini ovundileyo imele labo abalenhliziyo enhle, elungileyo, abalizwayo ilizwi, baligcine bathi ngokubambelela bathele izithelo.

Isibane Phezu Kwesiqobane

16 “Kakho olumathisa isibane asifihle ngaphansi kwesitsha kumbe asibeke ngaphansi kombheda. Kodwa usibeka esiqobaneni ukuze kuthi labo abangenayo babone ukukhanya.

17 Ngokuba kakukho okufihliweyo okungakuvezwa obala, njalo akukho okuthukuziweyo okungayikwaziwa kumbe kuchaywe obala.

18 Ngakho nanzelelani ukuthi lilalela kanjani. Lowo olakho uzakwengezelelwa; lowo ongelakho lalokho athi ulakho uzakwemukwa.”

Unina KaJesu Labafowabo

19 Unina kaJesu labafowabo beza ukuzambona kodwa behluleka ukufinyelela kuye ngenxa yokuminyana kwabantu. 20 Omunye wamtshela wathi, “Unyoko labafowenu bakulindele phandle, bafuna ukukubona.”

21 Waphendula wathi, “Umama labafowethu yilabo abalizwayo ilizwi likaNkulunkulu balenze.”

UJesu Uthulisa Isiphepho

22 Ngelinye ilanga uJesu wathi kubafundi bakhe, “Kasiyeni ngaphetsheya kwechibi.” Base bengena esikepeni bahamba. 23 Bathe belokhu behamba yena walala. Kwafika isiphepho phezu kwechibi isikepe saqalisa ukugalula, baba sengozini embi.

24 Abafundi bahamba bayamvusa besithi, “Nkosi, Nkosi, nanku sesigalula bo!” Wavuka wawukhuza umoya lamanzi ayeyabuka; isiphepho sadeda, kwathula cwaka. 25 Wababuza abafundi bakhe, wathi, “Kungaphi ukukholwa kwenu na?” Babuzana ngokumangala lokwesaba bathi, “Kanti ungubani lo? Ukhuza kanye lomoya lamanzi kumlalele.”

Ukusiliswa Kwendoda Ephethwe lidimoni

26 Bagwedla isikepe baya emmangweni wamaGerasene, okungaphetsheya kwechibi kusuka eGalile. 27 Kwathi uJesu esehla okhunjini wahlangabezwa yindoda ephethwe lidimoni iqhamuka ngasedolobheni. Indoda le yayisilesikhathi eside ingavunuli zigqoko, ingahlali endlini, kodwa ihlala emathuneni.

28 Yathi ibona uJesu, yahlaba umkhosi yazilahla ezinyaweni zakhe iklabalala ngelizwi elikhulu isithi, “Ufuna ukungenzani, Jesu, Ndodana kaNkulunkulu oPhezukonke? Ngiyakuncenga, ungaze wangichukuluza!” 29 Ngokuba uJesu wayeseyale umoya omubi ukuthi uphume kuleyondoda. Izikhathi ezinengi wawumdumela, kwale loba wayebotshwe ngamaketane ezandleni lezinyaweni njalo ehlezi elindiwe, wayewaqamula amaketane idimoni limfuqele enkangala.

30 UJesu wambuza wathi, “Ungubani ibizo lakho?” “NginguLigiyoni,” waphendula, ngoba amadimoni amanengi ayengene kuye.

31 Amncenga futhi futhi ukuthi angawalayi ukuthi ayewolokothela eMgodini oNgelamkhawulo.

32 Umhlambi omkhulu wezingulube wawusidla khonapho eceleni koqaqa. Amadimoni acela uJesu ukuthi awavumele ukuyangena kuzo, laye wawavumela. 33 Amadimoni aphuma endodeni ayangena ezingulubeni, umhlambi wathi zimu ubaleka wayakhalakathela eliweni wagxumukela echibini wagalula.

34 Labo ababelusile izingulube lezo bonela ukubona okwasekwenzakele babaleka bayabika edolobheni lemmangweni wakhona, 35 abantu base beqonda khonale ukuyabona okwasekwenzakele. Bathi befika kuJesu bayifumana indoda okwakukhutshwe kuyo amadimoni ihlezi ezinyaweni zikaJesu, igqokile njalo ingqondo isibuyile; besaba kakhulu.

36 Labo ababebonile kusenzakala batshela abantu ukuthi indoda eyayiphethwe lidimoni yasiliswa njani.

37 Kwasekusithi bonke abantu bommango wamaGerasene bamcela uJesu ukuthi kasuke kubo ngokuba babekhulelwa yikwesaba. Ngakho wangena esikepeni wahamba.

38 Indoda leyo eyakhutshwa amadimoni yamncenga ukuthi ahambe layo, kodwa uJesu wala wathi, 39 “Buyela ekhaya uyofakaza ukuthi uNkulunkulu ukwenzeleni.” Yikho indoda yahamba yafakaza kulo lonke idolobho konke uJesu ayeyenzele khona.

Intombazana Efileyo Lowesifazana Ogulayo

40 Kwathi uJesu esebuyile wahlangabezwa lixuku labantu elikhulu, ngokuba bonke babemlindele. 41 Indoda eyayithiwa nguJayirosi, umbusi wesinagogi, yeza yazilahla ezinyaweni zikaJesu, imncenga ukuthi eze endlini yayo

42 ngokuba indodakazi yayo eyodwa zwi, intombazana eyayileminyaka elitshumi lambili, yayisifa. Kwathi uJesu esesiya khona abantu bamminyezela ingathi bazampatshaza.

43 Khonapho kwakulowesifazana owayekade ephethwe yikopha okweminyaka elitshumi lambili, kodwa kungekho owayengamsiza. 44 Weza ngemuva kukaJesu wathinta umphetho wesigqoko sakhe, kwathi masinyane ukopha kwaphela.

45 UJesu wabuza wathi, “Ngubani ongithintileyo?” Kwathi ngoba bonke bephika uPhethro wathi, “Nkosi, abantu bayaminyezelana besondela kuwe.”

46 Kodwa uJesu wathi, “Ukhona ongithintileyo; ngiyazi ukuthi amandla aphumile kimi.”

47 Owesifazana esebone ukuthi uzacina eboniwe weza ethuthumela wazilahla ezinyaweni zakhe. Wachaza phambi kwabantu bonke ukuthi kungani wayemthintile uJesu lokuthi wasiliswa njani masinyane. 48 UJesu wasesithi kuye, “Ndodakazi, ukholo lwakho lukusilisile. Hamba ngokuthula.”

49 Kwathi uJesu elokhu esakhuluma omunye weza evela endlini kaJayirosi umbusi wesinagogi, wafika wathi, “Indodakazi yakho isifile. Ungabe usamhlupha umfundisi.”

50 UJesu wathi ekuzwa lokhu wathi kuJayirosi, “Ungesabi, wena kholwa kuphela, izaphiliswa.”

51 Wathi esefikile endlini kaJayirosi kavumelanga muntu ukungena laye ngaphandle kukaPhethro loJohane loJakhobe, kanye loyise womntwana lonina. 52 Kunjalo nje inengi labantu babekhihliza isililo bekhalela intombazana. UJesu wathi kubo, “Thulani ukukhala. Kafanga kodwa ulele.”

53 Bamhleka uJesu ngoba besazi ukuthi intombazana yayisifile. 54 Kodwa wayibamba ngesandla wathi, “Mntanami, vuka!” Umoya wayo wabuya, masinyane yasukuma yathi lothu!

55 UJesu wasesithi kabamnike ukudla.

56 Abazali bakhe bamangala, kodwa wabalaya ukuthi bangatsheli muntu ngalokho okwakwenzakele.